خه‌بات و تێکۆشانی ئێمه‌ له پێناوی ده‌وڵه‌تێکی سه‌ربه‌سته‌ بۆ گه‌لی کوردستان
In Kurdish
In English
In Farsi
In Arabic
 
کار و چالاکی ڕابردووی پارتیمان

ڕه‌نگاوڕه‌نگ


شاری حه‌وزه‌ گه‌وره‌ :
به‌ ناوی کوردستانی گه‌وره‌ .

ح. س. سۆران

شاری حه‌وزه‌ گه‌وره‌ :

زۆر له‌ شارگه‌لی کوردستانی مه‌زن ، ناسناوی دیڕۆکی تایبه‌تی خۆیان هه‌یه‌ ، وه‌ک مه‌هاباد (شاری چوار چرا ) ، سه‌قز ( شاری 11 ئه‌ستێره‌ ) ، سنه‌ ( شاری ئه‌رده‌ڵان ) ، هه‌ولێر ( شاری قه‌ڵا و مناره‌ ) و ... . هه‌مو ده‌زانین ، که‌ ته‌واوی ئه‌و ناسناوگه‌له‌ ، هۆی تایبه‌تی خۆیان هه‌یه‌ و مه‌به‌ستگه‌لی مێژویی وه‌بیر ده‌خه‌نه‌وه‌ .

ئه‌ز پێشنیارێکم هه‌یه‌ له‌ خزمه‌ت خوێنه‌ران دا . هیوام وایه‌ ،‌ که‌ به‌ کوردی و وردی به‌ خشڵی سه‌رنجی خوێنه‌رانی رێزدار بڕازێته‌وه‌ و په‌سه‌ند بکرێ .
پێشنیاره‌که‌ سه‌باره‌ت به‌ دانانی ناسناوێکی تایبه‌ت بۆ شاری بۆکانه‌ ، له‌ ناوچه‌ی موکریان ، رۆژهه‌ڵاتی کوردستان .

پێشنیار ده‌که‌م ، که‌ ئه‌م شاره‌ ناسناوی ( شاری حه‌وزه‌ گه‌وره‌)ی پێ بدرێ و له‌مه‌و دوا ، ئه‌م ناسناوه‌ی بۆ به‌ کار بهێنین .

هۆی پێشنیاری ئه‌م ناسناوه‌ ئه‌وه‌یه‌ ، که‌ :

له‌ شاری بۆکان ، حه‌وزێکی روون و خاوێن هه‌یه‌،‌ به‌ حه‌وزه‌ گه‌وره‌ به‌ ناوبانگه‌ و هه‌ر له‌ زه‌مانی زوه‌وه‌ پێیان وابوه‌ ، که‌ ئاوی ئه‌و حه‌وزه‌ که‌ وه‌ک چاوی قرژاڵ روشنه‌ ، له‌ کێوی ناڵه‌شکێنه‌وه‌ دێ ، که‌ نووساوه‌ به‌ رۆژهه‌ڵاتی شاره‌وه‌ . کاتی زو ، ئه‌و حه‌وزه‌ وه‌ک کانی شار بۆ ئاوی خواردنه‌وه‌ و ته‌نانه‌ت شیو وکوڵ که‌ڵکی لێ وه‌رگیرراوه‌ و ده‌یان گۆرانی، به‌یت وبالۆره‌ و فۆلکلۆر سه‌بارت به‌و حه‌وزه‌ هه‌یه‌ . ئه‌ز له‌ بیرمه‌ پزیشکێکی ئه‌لمانی به‌ ناوی د. فرێدریش ، له‌ ساڵه‌کانی 30 هه‌تاوی دا ، هات بوه‌ دوکتوری ده‌رمانگه‌ی بۆکان و هێندێک نه‌رده‌ و شتی وای لێدا ، که‌ خه‌ڵک مه‌له‌ی تێدا نه‌که‌ن ، ده‌ستنوێژی لێ نه‌گرن تا ئاوی خواردنه‌وه‌ خه‌ڵک پیس نه‌بێ ، له‌ پاشان سه‌ری حه‌وزه‌ که‌یان داپۆشی و ئێستاش هه‌ر داپۆشراوه‌ .

قه‌راغ حه‌وزه‌ گه‌وره‌ ، وه‌ک ناوه‌ند و مه‌یدانی شاریش که‌ڵکی لێ وه‌رگیرراوه‌ . له‌ ساڵی 1325 ی هه‌تاوی دا ، پاش رووخاندنی کۆماری دێمۆکڕاتیکی کوردستان ، نه‌مر عه‌لی شێرزاد ، فه‌رمانده‌ی هێزی بۆکان ، له‌ لایه‌ن رێژیمی شاوه‌ ، له‌سه‌ر ئه‌م حه‌وزه‌ له‌ سێداره‌ درا . جا ، بۆ رێز گرتن له‌ نه‌مر عه‌لی شێرزاد و پیرۆز راگرتنی ناوی ئه‌و خۆشه‌ویسته‌ ، با ناسناوی ( شاری حه‌وزه‌ گه‌وره‌) ، بۆ ئه‌م شاره‌ دابنێین ، که‌ به‌ تیرێک دو نیشان ده‌شکێنین : (1) ناوی نه‌مر عه‌لی شیرزاد له‌ سه‌ر زران ڕاده‌گرین ؛ (2) ناوی دیڕۆکی حه‌وزه‌ گه‌وره‌ش ده‌پارێزین .

تێبینی پێویست : ره‌نگه‌ ئه‌م پرسیاره‌ بکرێ ، که‌ بۆکان مرڤی ناوداری وه‌ک ماموه‌ستا هه‌ژار ( که‌ خه‌ڵکی گوندی ته‌رغه‌ی بۆکان بوه‌ ) ، ماموه‌ستا حه‌سه‌ن زیره‌ک و کاک سواره‌ یه‌لخانی زاده‌ شی لێ هه‌ڵکه‌وتوه‌ ، بۆ به‌ ناوی ئه‌وانه‌وه‌ نه‌بێ ؟ . وه‌ڵامی ئه‌م پرسیاره‌ ئه‌وه‌یه‌ ، که‌ ئه‌وان بۆ ته‌واوی خه‌ڵکی کوردستان به‌ باشی ناسراون ، ته‌نانه‌ت ده‌توانم بڵێم زۆر که‌س بۆکان به‌ ناوی ئه‌وانه‌وه‌ ده‌ناسێ ، نه‌ک ئه‌وان به‌ بۆنه‌ی بکانه‌وه‌ . نه‌مر عه‌لی شێرزاد ، بوه‌ته‌ شه‌هیدی گومناو ، که‌ پێویسته‌ له‌ گۆمی گومناوی ده‌ری بهێنین .

ده‌لێن قسه‌ ، قسه‌ دێنێ : ئه‌ز وێنه‌ی دیمه‌نی له‌ سێداره‌دانی نه‌مر عه‌لی شێرزادم دیوه‌ و، ره‌نگه‌ ئێوه‌ش چاوتان پێی که‌وتبێ ؟ هه‌ر وه‌ک له‌و وێنه‌یه‌ دا ده‌بینین ، ئه‌و رۆژه‌ حه‌شیمه‌تێک ، که‌ زۆریان کۆلکه‌ مه‌لاو شت و متی وا بوون ، له‌ کاتی له‌داردانی نه‌مر عه‌لی شێرزاد دا، له‌وێ راوێستاون . ئه‌ز ئه‌م پرسیاره‌م هه‌یه‌ ، که‌ ئایا ئه‌وانه‌ هاتبوون داکۆکی له‌ شه‌هیدی نیشتمان بکه‌ن ، یا خودای نه‌خواسته‌ بۆ چی ؟ نه‌مر عه‌لی شێرزاد خالۆزای پێشه‌وا قازی محه‌ممه‌د و خه‌ڵکی ئاوایی یه‌کشه‌وه‌ی ناوچه‌ی بۆکان بوه‌ و گڵکۆی وا له‌ گۆڕخانه‌ی خانه‌قا ، له‌ نێوان شاری بۆکان و مه‌هاباد د ا ، که‌ به‌ هیوام هاونیشتمانگه‌ل له‌ بیری نه‌که‌ن و به‌ تایبه‌ت بچنه دیتنی .

نامرن ئه‌وانه‌ی له‌ دڵی میلله‌تا ده‌ژین .

نووسه‌ر‌‌ : ح. س. سۆران
ڕێکه‌وتی: : 2007-06-21 23:57:09
ئه‌و بابه‌ته‌ : 23868 خوێندراوه‌ته‌وه‌‌
 
 
■ مافی کۆپیکردنی وتار و وێنه‌.

ئه‌و بابه‌تانه‌ی ناوه‌ندی ڕاگه‌یاندنی پارتی سه‌ربه‌ستیی کوردستان خاوه‌ندارێتیان ده‌کاتن، ئازادن بۆ بڵاو کردنه‌وه‌ و کۆپی کردنه‌وه‌، ئه‌گه‌ر مه‌به‌ست به خزمه‌تکردن به نه‌ته‌وه‌‌که‌مان بێت، به مه‌رجێک ئاماژه‌ به سه‌رچاوه‌که‌ی بکرێ. 

 
■ زانیاری په‌یوه‌ندی بۆ به‌شی ڕاگه‌یاندن
مه‌کته‌بی سه‌رکردایه‌تی پارتیمان له ئۆسلۆی پایته‌ختی نه‌رویجه‌، هه‌روه‌ها پارتیمان له وڵاته‌کانی دیکه‌ی ئه‌وروپا له به‌رنامه‌دا هه‌یه‌ که ئۆفیسی خۆی بکاته‌وه‌.