بەیاننامەی ئەنجوومەنی سەرکردایەتی پارتی سەربەستیی کوردستان لە یادی ١٠ی خاکەلێوە ڕۆژی

 

 بەیاننامەی ئەنجوومەنی سەرکردایەتی پارتی سەربەستیی کوردستان لە یادی ١٠ی خاکەلێوە ڕۆژی شەهیدانی کوردستان.



کوردستانیانی زێد و نیشتیمان داگیرکراو:
مێژووی خۆڕاگری و خەباتی بەردەوامی گەلەکەمان
, پڕە لە کارەسات و هەوراز و نشێوی جۆراو جۆرە، گەلەکەمان خاوەنی دەریایەک خوێنی ڕژاوی خەبات و تێکۆشانە لە پێناو ڕزگاری وسەربەخۆیی یەکجاریی نیشتیمانەکەی.  کە یەکێک لەو ڕۆژە خوێناوییەی دەریای خوێنەڕژاوەکان، ڕۆژی ١٠ی خاکە لێوە رۆژی لە سێدارەدانی یەکەم سەرۆککۆماری سەربەخۆیی وڵاتەکەمانە، کە ٧٤ ساڵ پێش بە تاوانی ڕاگەیاندنی سەربەخۆیی کوردستان، لە دادگایەکی نا دادپەروەری سەربازیدا سزای مەرگی بە سەردا سەپێنرا.

ئەنجومەنی سەرکردایەتی پارتی سه‌ربه‌ستیی کوردستان،  هەموو ساڵێک ئەم یاده‌ ماته‌مینه‌ی شه‌هیدانی سه‌ربه‌رزی کۆماری کوردستان، بە یەکێک لە گەورەترین و گرنگترین ڕووداوەکانی مێژووی جووڵانەوەی نەتەوەیی گەلەکەمان دەزانێت ، ڕۆژی شەهیدبوونی پێشەوا و هەڤاڵانی بە ڕۆژی بیرکردنەوەی زیاتر و ئامادەکاری زیاتر، بۆ خەبات لە پێناو نۆێکردنەوەی دەوڵەتێکی دیکەی سەربەخۆیی کوردستان دەزانین.


 وەک پارتی سەربەستی کوردستان، داوا لە خەلک و لایەنە سیاسییەکانی کوردستانی داگیرکراومان دەکەین کە : با هەموو لایەکمان مەبەستی سەرەکی خەبات و تێکۆشانمان درێژەدان بێت ئامانجە سەرەکییەکەی سەرقافڵەی شەهیدانی کورد واتە پێشەواقازی،  و کار بۆ ئەوە بکەین کە قازی مۆحەممەد وەک سۆمبۆلێکی مێژوویی لە ڕێبازی خۆراگری و نەتەوەیی لە هەموو کوردستانی گەورە و هەموو جیهان بناسرێت .

هەر لەم ڕۆژە ماتەمینە کە ڕۆژی لە دەستدانی سەرۆککۆماری کوردستانە، دیسانەوە وەک دەیانجاری دیکەش بانگێشەی گشت لایەنەکانی کوردستانی دەکەین، کە با پاش ٧١ ساڵ بە سەر شەهیدبوونی پێشەوای هەرگیز نەمرمان، بتوانین ڕەوڕەوەی خەباتمان بەرەو لای سەربەخۆیی بسوورێنین. و ڕۆحی تەبایی و نزیکایەتی لایەنە کوردستانیەکان زیاتر پەرە پێبدەین، بۆ ئەوەی بتوانین پێکەوە هەنگاوی باشتر بۆ ڕزگاری نیشتیمانەکەمان بنێن.

بەردەوام بێت خەباتی ڕزگاریخوازی لە پێناو سەربەخۆیی گەلە خاک و سامان داگیرکراوەکەماندا.

ئەنجومەنی سەرکردایەتی پارتی سه‌ربه‌ستیی کوردستان

١٠ی خاکەلێوەی ٢٧٢١ ی کوردی، ٢٠٢١ی زاینی.
ڕێکه‌و 2021-03-28 11:09:05
به‌شی ( فعالیتها )







سیاسی