پیته‌ر گاڵبرێت: ئه‌گه‌ر تورکیا روبه‌‌ڕوى سه‌ربه‌خۆیی کوردستان ببێته‌وه‌، ده‌بێت شه‌‌ڕ له‌گه‌ڵ 100 هه‌زار پێشمه‌رگه‌ى کوردستان بکات [15:28 , 14 Oct 2006] پیته‌ر گاڵبرێت باڵیۆزى پێشووى ئه‌مه‌ریکا له‌ کرۆواتیا، دووپاتى کرده‌وه‌ ئه‌گه‌ر بێتو تورکیا بیه‌وێت به‌شه‌‌ڕ روبه‌‌ڕوى سه‌ربه‌خۆیی هه‌رێمى کوردستان ببێته‌وه‌، ده‌بێت شه‌‌ڕ له‌گه‌ڵ سه‌د هه‌زار پێشمه‌رگه‌ى کوردستان به‌رپا بکات و ئه‌مه‌ش جه‌نگێکى گه‌وره‌ى نێوان هێزه‌کانى تورکیا و سوپاى ئه‌مه‌ریکاى لێده‌که‌وێته‌وه‌. له‌ لێدوانێکیدا بۆ رۆژنامه‌ى تایگه‌ر سایتوونى ئه‌ڵمانى گاڵبرێت جه‌ختى کردۆته‌وه‌ هه‌ر جۆره‌ هێرشێکى تورکیا بۆ سه‌ر هه‌رێمى کوردستان خه‌ونى ئه‌ندامێتى ئه‌نقه‌ره‌ له‌ یه‌کێتى ئه‌وروپا له‌ بار ده‌بات و هه‌روه‌ها کورد پێی ده‌کرێت ڤێتنامێکى دیکه‌ له‌ ناو تورکیا دروست بکات. له‌ درێژه‌ى لێدوانه‌که‌یدا بۆ رۆژنامه‌ى تایگه‌ر سایتوونى ئه‌ڵمانى گاڵبرێت داواى له‌ ئه‌مه‌ریکا کردووه‌ هێزه‌کانى له‌ ناوه‌‌ڕاست و باشوورى عێراق بکشێنێته‌وه‌ کوردستان و ئه‌گه‌ر پێویست بکات له‌وێوه‌ شان به‌شانى هێزه‌کانى پێشمه‌رگه‌ى کوردستان شه‌‌ڕى دژه‌ چه‌کدارانى رێکخراوى تیرۆریستى ئه‌لقاعیده‌ بکه‌ن. شایه‌نى باسه‌ پیته‌ر گاڵبرێت یه‌کێکه‌ له‌و دپلۆماتکارانه‌ى ئه‌مه‌ریکا که‌ پشتگیرى له‌دۆزى کورد ده‌کات و تا ئێستا له‌م روه‌وه‌ چه‌ندین وتار و لێکۆڵینه‌وه‌ى نوسیوه‌ و هه‌روه‌ها یه‌کێکه‌ له‌و که‌سانه‌ى داوا ده‌که‌ن رۆڵى زیاتر به‌ کورد له‌ رۆژهه‌ڵاتى ناوه‌‌ڕاست بدرێت.