ڕاگەیاندراوی پارتی سەربەستی کوردستان بەبۆنەی کردەوە تیرۆریستیەکەی شاری هەولێر





دیسان خوێن و دیسان ئاگر و تیرۆر تۆقاندن، دیسان بۆمب و باڕووت و گوللە و شەمشەمە کوێرەکانی تاریکی پەرەست دەستیان دایە دەستی یەکتر و بەربوونە گیانی خەڵکی هەولێری هۆلاکۆ بەزێن و ڕەشپۆش و خەڵتانی خوێنیان کرد.


وەک لە هەواڵەکاندا بڵاو کرایەوەو لە کاتێکدا کە خەڵکی کوردستان سەرقاڵی دەربڕینی خۆشی و شادی ئەنجامەکانی پرۆسەی هەڵبژاردن بوون، دەستی ڕەشی دوژمنانی ئازادی خۆی گەیاندە هەولێری پێتەختی هەرێمی کوردستان و لە کردەوەیەکی تیرۆریستی پراکتیزەدا هێرشیان کردە سەر ئاسایشی گشتی ئەو شارە و لەو پەلامارە ناجوامێرانەیەدا چەندین شەهید و برینداری لێکەوتەوە و هەولێری پێتەختی هەرێمی کوردستانی ڕەشپۆش کرد.


پارتی سەربەستی کوردستان وێڕای مەحکوم کردنی ئەم کردەوە تیرۆریستی یە، سەرخۆشی خۆی پێشکەشی بنەماڵەی ئەو شەهیدانە دەکات و هیوای چاکبوونەوەی هەرچی زوتریش بۆ بریندارەکان بە ئاوات دەخوازێت.


ئاشکرایە کە ئه مه یه که م جار نیه دوژمنانی نەتەوەی گەورەی کورد زوخاوی ڕەشی دڵی پڕ لە قینیان بەسەر خەڵکی ئەم  هه رێمه ئازادەدا دەڕێژن و بە خەیاڵی خاوی خۆیان ئارامی و ئاسایشی خەڵکی کوردستانی ئازاد تێکدەدەن، نەیارانی ئاشتی و ئاوەدانی و پێشکەوتن گەرەکیانە کاروانی  ئاشتی و ئاوه دانی و پێکەوەژیان له هه رێمی کوردستان لە بار بەرن ترس و دڵەڕاوکێ بخەنە نێو دڵی دانیشتوانی ئەم هەرێمە، بێ خەبەر لەوەی کە دام و ده زگا ئەمنیەکانی حکومه تی هه رێمی کوردستان و  بگرە هەر تاکێکی کوردیش ئامادەی فیداکاری و  بەرپەرچدانەوەی هەرجۆرە هێرش و پەلامارێکە کە دەکرێتە سەر هەر ناوچە و هەرێمێکی کوردستان. پوچەڵ کردنەوەی دەیان پیلان و کردەوەی نەزۆکی تیرۆریستان لە شارە جۆراوجۆرەکانی کوردستان سەلمێنەری ئەم ڕاستیەن کە هەر تاکێکی کورد پێشمەرگە و پارێسەری ئەم هەرێمە ئازادەیە کە بۆتە چقڵی چاوی داگیرکەران.  


پارتی سەربەستی کوردستان وێڕای دووبارە شەرمەزار کردنی ئه م کرده وه تیرۆریستی و نامرۆڤانەیە ، پرسه و سه ره خۆشی خۆی پێشکەشی بنه ماڵه ی ئەم شه هیدانە ده کات و هیوای هه رچی زووتر چاکبونه وەش  بۆ برینداره کان به ئاوات ده خوازێت.


 


ئەنجومەنی سەرکردایەتی


پارتی سەربەستی کوردستان


٢٩/٩/٢٠ ١٣


٧ی ڕەزبەری ٢٧١٢